اهلا وسهلا بكم في منتدى الحلوين نتمنى تسجيكم .. ^^
 
الرئيسيةمكتبة الصورس .و .جبحـثالمجموعاتالتسجيلدخول

شاطر | 
 

 قصائد فخر وتحدي للشاعرة اسيرة الصمت

اذهب الى الأسفل 
كاتب الموضوعرسالة
????
زائر



مُساهمةموضوع: قصائد فخر وتحدي للشاعرة اسيرة الصمت   الجمعة أغسطس 12, 2011 1:12 am

من ديوان الشاعرة اسيرة الصمت
التحدي

ما هوب أنا اللي انسحب من اول الجولة
والله لا اقاوم لآخر قطرة بدمي

أما اني أفوز او أموت مقتولة
والله اني ما اداري ضعفي بكمي

راسي عزيز و شموخي محد يطوله
ما ينحني راسي لخالي ولا لعمي

من دون دمعي سيوف الرمش مسلولة
والله ما قد ذرفته حتى عند أمي

أنا التناقض بطبعي بس باصوله
مرات بلسم ومرات أسقي السمي

روحي ما هي روح روحي كنها دولة
ما يهزها ريح او تتاثر بذمي

ما احد يثنيني ولا يقنعني بسهولة
عن العواذل آذاني كلها صمي

والآراء اللي توجه لي مشلولة
ترجع لأهلها قبل ما تتجه يمي

ما احب اشكي ولا كل شي أنا اقوله
لغير ربي أبد ما اشتكي همي

وان قلت كلمة عليها صرت مسؤلة
أوزن كلامي قبل ما ينطقه فمي

عدم استسلامي بحد ذاته بطولة
نختني العزة وجاوبتها سمي

أسيرة الصمت

~~~~~~~~~~~~~~~~~~

بنت الحمايل

بنت الحمايل كلها دم وإحساس
لاعاش راس الجاهل اللي دفنها

هي درة ما جابها كل غطاس
ومن لايعرف الدر يرخص ثمنها

منهو يساومني عليها من الناس
منهو بسجنه قد تجرأ وسجنها

هو مادرى أنها حرة ترفع الراس
ماترضى غير العز لو هو كفنها

حرة أصيله مرهفة طيبة ساس
عقل وجنون الكون كله سكنها

لاتظن تشريها بحبر وقرطاس
لا والذي بعيون خلقه فتنها

هذي تراها اللي حمى صعب ينداس
اللي مشارف نجد أصلا وطنها

بنت العروبة رمز فخر ونوماس
بمليون راس وراس لو تمتحنها

أسيرة الصمت
~~~~~~~~~~~~~~~~~~~~~~~~~~~~
لعبة الشطرنج

ماهوب أنا اللي ينلعب بي شطرنج
محد يحدد مكاني بكيفه

جمالي ما هو مثل بنات الافرنج
يعرض لجذب اهل النفوس الضعيفة

ما في عروقي دم روم ولا زنج
عروقي بدم العروبة نظيفة

أبوي ما هو خورشيد ولا تشنج
سعود أبوي اللي يمينه عفيفة

لي كلمة تاثيرها أقوى من البنج
وأحد من ضربة شجاع بسيفه

والساحة بحر ضم مرجان واسفنج
والموج يلفظ بس الاشياء الخفيفة

ماجت نجوميتي باغراء أو غنج
ولا بتلميع المحرر لضيفه

نجمة بفكري وان غدا الشعر شطرنج
لي اسم يكرم عن خداعه وزيفه

أسيرة الصمت
~~~~~~~~~~~~~~~~~~~
لا تفكر

لاتفكر إني عنك أصد مابيك
لكني أحفظ عزتي في صدودي

ولاتفكر إنك لو تغليت أباجيك
كلما تغلى زود صدي يزودي

وإن كان حارت صورتي وسط عينيك
مانيب أنا صورة سكنها الجمودي

لاتحسب إني لعبة بين أياديك
كلي تحدي وكبرياء وصمودي

الله خلقني ند وأقدر أجاريك
وما أعجز إني أحبسك بقيودي

لكن أبتحملك دام إني أرجيك
ودام إني أحبك أبلزم حدودي

وأصد وأحفظ عزتي منك وليك
حتى تعرف قدري وتحفظ عهودي

اسيرة الصمت
~~~~~~~~~~~~~~~~~~~~~~~~~~~~~~~~~

أنا متحررة وانا داخل عباتي

انا متحرره
وانا داخل عباتي
ما اتبع أحد
ولا أحد انتمي له!
أنا اللي اقرر حياتي
وهمي ما أبي أحد يشيله
عقلي وقلبي ..
ملك ذاتي
ما هيب ملك القبيلة
لاتبني علي آمال....
آمالك كلها مستحيلة
صعب إني اخضع لك
ما انخلقت أكون لك ذليلة !
حتى لو ضحكت لك ...
وحتى لو غنجت لك...
أبعد من السحاب اللي تخيله
أنا بنت ها لعالم
وأنا به دخيلة
أبقدم نفسي
علي اساس إنها نفسي
ماهوب لأني لحاتم سليله..
من قال لك تحبني ؟؟
من قال لك تسهر لي كل ليلة ؟؟
أنا بحد ذاتي دولة
أنا بحد ذاتي زمن برعيلة ....
بي من أصالة قديمة ...
وبي من طيش جيله
ومن تخطي السور عمرة ما يجي له
أنا مستقلة بذاتي..
وأنت استقل بذاتك
سواء كنت صديقتك..
أو صرت لك خليلة
الشمس ماهيب لأ حد
ولا تحجبها الغابات الظليله
وعمرة ما كان لها أخت
وعمرة ما جاء لها بديلة
باختصار....
أنا الفرس الأصيلة
اللي ماتروض...
ولا أحد تنتمي له !!!

أسيرة الصمت
~~~~~~~~~~~~~~~~~~~~~~~~~

ما تهزني دمعتك

ما تهزني دمعتك لو هي حقيقه
من بعد ما مثلتها لي تمثيل

لا تستغل اني بشعوري رقيقه
وتخلي من الحبه قبه وتهويل

كنت آتفاعل مع قصصك الدقيقه
يوم أنت ترويها بدقه وتفصيل

تألف خيال وتخرجه في دقيقه
وما ترضى عن دور البطل أي تبديل

والله ما اصدق لو بقلبك حريقه
ولو شفت دمعك من على خدك يسيل

كذاب ..خذها كلمة من صديقه
السالفه ما عاد تحتاج تطويل

والحب عمره ما يجي بهالطريقة
متى التعاطف كان للحب تدليل !

أسيرة الصمت

~~~~~~~~~~~~~~~~~~~~~~~~~~~~~~~~~~~

صديقي

أنا صديقي قلمي ودفتر أشعار ي
ما أبي أحد من العالم يساعدني

لها أنتفض وآتمرد وافشي أسراري
في هالزمن ما أظن أحد يساندني

يا مقنع بالوفا .. وجه الغدر عاري
حتى على هالشقا والهم تحسدني

عين على الباب واذن ترصد أخباري
نيتك قشرا ومعك الغدر واعدني

ما أنت بكفو تقتحم بجيوشك أسوار ي
في كل لحظه وحدسي عنك يبعدني

هزمتك بفطنتي مع سبق إصراري
وقعتك بفخك اللي به تطاردني

أنثى .. وأنت لعنادي تعجز إتجاري
ماقلت لك في البدايه .. لا تعاندني ؟!

أسيرة الصمت

~~~~~~~~~~~~~~~~~~~~~~~~~~~~
ورثة الطيب

حنا ورثنا الطيب أبا عن الجد
الطيب حنا أولى بعرشه و تاجه

طبيعي ان حنا على الطيب نحسد
من أدعياء الطيب زيف و سماجه

بالحاجب المعقود والشعر الأجعد
عن غيرنا نعرف بوقت المواجه

حنا سلايل حاتم اسم محدد
بالطيب ما احد تخطى سياجه

حنا أسطورة وجد دايم تردد
حنا أساس الحب قبل انتهاجه

حنا بليلى وقيس حب مخلد
حلوه و مره عذب ماه و هماجه

في نجد حنا المجد اللي تجدد
نسبق بميدان تعلا عجاجه

حنا المزون لكل صحراء توجد
حنا الربيع وفجره وابتهاجه

لا شافنا ليل ظلامه تبدد
حنا شموس الليل حنا سراجه

حنا مزايا طيبنا ما تعدد
بأعلى المراتب نسكن ببرج عاجه

أسيرة الصمت

~~~~~~~~~~~~~~~~~~~~~~~~~~~~~~~~~~

تولة المشاعر

عندي المشاعر مثل عطر بتولة
ما احد فتحها او شم ذرة من العطر

او مثل خمر معتق في بطوله
عذراء المشاعر يعني وثيب الفكر

شعوري أرض ما تجي بالسهولة
ما يجيبها الا فارس شهم وخطر

ما بي" متنبي "ولا "سيف دولة "
مفتاحها طلاسم وقفلها سحر

أبي ذكاء "ابن الوليد" بأصوله
حتى ب"سيف الله" يحلا لي الشعر

واكتب قصيدي فيه رمز البطولة
بأول البيت ألمحه وآخر الشطر

وانثر له الريحان والناس من حوله







ويسيل دمعي في غيابه كما القطر

ومن راح عندي له كلام بقوله :
لا قطف بي زهرة ولا شم لي عطر

الشاعرة اسيرة الصمت






قصائد الغزل والعتاب

اكذب

ازعل علي واكذب وأنا آتحراك
الكذب صدق.. ان كان جاء من حبيبي

يا حلو طعم الكذب لا جاء من شفاك
عسل وبلسم للخفوق العطيبي

غالي وتغلى راضيه وآترجاك
وأرجي من المولى تجي من نصيبي

ياويل قلب عذبه طول فرقاك
بعينه شروق الشمس يصبح مغيبي

بلحظة غضب حسبت أني بنساك
لا شك عيت ذكرياتك تغيبي

قصايدي تزهر بشوفة محياك
ويفوح منها فوق الاوراق طيبي

تضحك لي حروف الشعر يوم لقياك
يا ساكن قلبي واقرب قريبي

ان قلت تهواني فأنا والله أهواك
وان قلت: أحبك ..فأنت والله حبيبي

أسيرة الصمت

~~~~~~~~~~~~~~~~~~~~~~~~~~~~~~


اللي بي أكبر

اللي بي أكبر من فراقي لغالين
لو ان فرقاهم كثير صفعتني

أظن اللي .. بي وداع المحبين
كنت أبقوله والكرامه عصتني

ماهيب من عاداتي أتبع مقفين
لو نار أشواقي لهم ولعتني

وان شفت خلاني على البعد ناوين
أبعد.. ورجلي باعتزاز أبعدتني

خليت أحاسيسي بصدري مغطين
واليوم صرختهن ترى فزعتني

كني جريح مرمي بين نارين
عزي وقرب عيوني مودعتني

وش عاد لا صرنا بروح أو بروحين
ان كانها العزة معك ما اجمعتني

مايجي بها ترجي ولا تجي بتكفين
ولا انذلت بيوم ولا أخضعتني

جا راكب لكن رجع دون خفين
وأنا الكرامه للنجوم ارفعتني

لا مرت الأيام أبي يذكر الزين
مصيرها الذكرى مثل ما ارجعتني ..

ترجعه لي غصب .. لا تله البين
وأقول له: لو عزتي طاوعتني

اللي بي أكبر من فراقي لغالين
لو ان فرقاهم كثير اصفعتني

الشاعرة أسيرة الصمت

~~~~~~~~~~~~~~~~~~~~~~~~~~~~~~
هلا بالحب

هلا بالحب وغصون الزهر والعشق وريح الورد
هلا بالنور لا غطى شعاعه ظلمة أيامي

هلا يا روعة الصورة شمس الأمس ونور الغد
هلا باللي يعلق على كفه سبحة احلامي

هلا باللي ينافسني على حبه هيام الود
هلا باللي يوصلني غلاه لذروة هيامي

هلا باللي يدفيني بصوته في ليالي البرد
هلا باللي برعشة صوت عذره تركد اعظامي

هلا بالبسمة اللي في طعمهامثل طعم الشهد
هلا بالمورد اللي من زلاله يروي الظامي

هلا باللي سكب دمعي وعلمني هواه السهد
ينام اللي سلا قلبه وجفن العين ما نامي

هلا بالطيب اللي والله اني أعشفه من جد
هلا يا نور عيني يا دواي وبلسم آلامي

هلا بأغلى الهدايا اللي من الرحمن لي تنمد
هلا باللي عيونه هي قصيدي و مصدر الهامي

هلا باللي غلاه بخافقي بين جزر ومد
خفوقي ساحل وعشقه بحر بالشوق مترامي

أهلي به عدد ما اشتقت له والشوق ما ينعد
بقلبي في غيابه كيف أجل لا صار قدامي

أسيرة الصمت

~~~~~~~~~~~~~~~~~~~~~~~~~~~~~~~~~~~~

شلال الشوق

أحس به شلال شوق بصدري
يصب في واحة وله كلها اشواق

شلال.. بعروقي مع الدم يجري
عجزت عن وصفه بحبر وأوراق

بان الوله بعيوني و زاد سحري
بالعين لوحة ..أذهلت كل مشتاق

نزعة غرام بي طبيعي و فطري
خلاني أصبح غير عن كل الأذواق

اللي بقلبي غير ما قلت .. تدري
يا صعبها .. لو أوصف احساس الاعماق

حبي لك اكبر من تعابير شعري
لو ينوزن حبك ملا كل الأفاق

جمر انتظار الوعد منك يا بدري
أحرقني اللي احرق قلوب عشاق

وشفتك ومنها بالغلا زاد قدري
ضميت لهفاتك و طولت بعناق

وضحك لك محياي من غير ما أدري
ضحكة علا تمسحني بمسحة اشراق

قلبي عزف يقول لك طال صبري
ومن الغلا مشاعري جت لك تساق

أسيرة الصمت


~~~~~~~~~~~~~~~~~~~~~~~~~~~~~
صباح الفل

صباح الفل والأزهار والعنبر
يا أحلى صوت في سمعي وفي هالكون

بعد ما هزني غصب علي يأمر
ولو يأمر علي كلي أنا الممنون

ترى ليلة غيابك كنها أشهر
وكن الدهر قربك غمضة بجفون

وانا اللي حالتي بعدك ما تتصور
ضريرة لو ملكت أجمل هدب وعيون

واذا شفتك يا بدر في سماي نور
لصدرك ضمني وفي سرك المكنون

عسل صافي غرام أحلى من السكر
معاك العمر له نكهه وطعم ولون

أحس القلب من فرقاك يتفطر
ولكن كل شي في رضاك يهون

أنا لو لاي أخاف الله وأتصبر
غيابك حدني بعد العقل لجنون

أسيرة الصمت


~~~~~~~~~~~~~~~~~~~~~~~~~~~~~

ظامية شوق

بعد الغرام اللي زرعت بوريده
وعشق بدمه له كتبت وكتبني

كلمة أحبك قلتها له قصيدة
وأنا اللي ارفض أقولها لو طلبني

شدت بها طيور الحشا بتغريده
لكن صدق ظنه وفعلا غلبني

بعد التغلي صار قلبي وقيدة
أشعل شموع الحب حتى نهبني

له ظامية شوق وأنا أول عنيدة
اذا ظميت الشوق شوقي شربني

جف الزهر والحب يابس جريدة
أنازع احساس لبعده قربني

دوخني بوعده ودخت بوعيده
ومواله أحزني عليه وطربني

ظماي ساقي الشوق دايم يزيده
ومثل العذاب اللي وهبته وهبني

مجدافي آهات الغرام العديدة
مع كل تيار لبره سحبني

له ظامية شوق ولا أتعب اعيده
حيث اللي سماني به شخص عجبني

يقول عني( ظامية شوق) أريده
تظماني وما احد كثرها سكبني

لها ابتسم لو بالظروف الشديدة
ومع طيفها أنسى كل شي تعبني

أسيرة الصمت

~~~~~~~~~~~~~~~~~~~~~~~~~~
أصعب لحظة

لو عشت أصعب لحظة بإنتظارك
الأصعب أيأس لحظة من رجوعك

كل الليالي تقول.. ليلة قرارك
للصبح : ياصبح استحاله طلوعك

مدري بعادك غصب أو باختيارك
بس الوكاد الحال بعدك يروعك

يا عين نورك غاب بأول نهارك
بالله وين اللي يكفكف دموعك ؟

أشعلت شوقي نار .. وأضرمت نارك
ومن متى جمر الشوق دفا ضلوعك

قل بس برجع وأنتظر في مدارك
العمر كله مع بقايا شموعك

وابني بنبض القلب في القلب دارك
الروح لك تظمأ وعيني تجوعك

واعيش عمري لحظة بانتظارك
بس المهم تتم لحظة رجوعك

أسيرة الصمت

~~~~~~~~~~~~~~~~~~~~~~~~~~~~~~~~~




يا حبيبي

يا حبيبي ما أقدر على فرقاك
خذني معك لا لا تخليني

أموت ما يطري علي أنساك
مادام طيفك ساكن عيني

لذة حياتي ضحكتك ورضاك
بس أنت يا شمس المحبيني

دنياي فرع أصلها دنياك
وشلون أبحيا لو تجافيني

دورت بك عيب لعل أسلاك
أثرك تجمل باقي سنيني

كن الغلا مخلوق لأجل أهواك
من بد كل الناس تعنيني

مدري لأن الشعر بك يزهاك
مدري لانك منكتب فيني

عمري وروحي كلها تفداك
أنت منى قلبي وأنت نظر عيني

أسيرة الصمت

~~~~~~~~~~~~~~~~~~~~~~~~~~~~~~~~~
قريت الرساله

قريت الرساله شوق..وأهتز لي غصن
وفاحت بقلبي وردة الحب وزهوره

وشدت لك بلابل لهفتي..فرحه وشجن
وبكلمة((أحبك)) غردت ألف عصفوره

كل الصحاري الجرد من فيضك أرتون
أحس بوصالك كل هالارض ممطوره

حروفك على قلبي مثل رشة المزن
خطك مثل برق خطف عيني بنوره

كلامك قصايد حب..صوتك لها لحن
كلام يفوق الشعر في صادق شعوره

بكيت..وغرقت بدمعي..وخيم الحزن
وضمت حروفك دمعة العين معذوره

من قوت إحساسك تزلزل له المدن
يغطي حدود الكون..ويفيض بحوره

تشوقت لك..وأشتقت لمغازل الحسن
ياوجه سرق منه الفجر للشفق صوره

ولك وحشة في خافقي مالها وزن
كفي بسلاسل حبك..أصبحت مأسوره


أسيرة الصمت

~~~~~~~~~~~~~~~~~~~~~~~~~~~~~~
الشرف..للي احبه

اللي أحب..الشرف له يوم حبيته
أعجبت به..والشرف له يوم يعجبني

رفعت راسي وأنا اللي قلبي أهديته
حاسبت نفسي قبل ربي يحاسبني

ذنوبي إني تخيلته وسميته
بإسم القصايد وبإحساس معذبني

يطري بنبضي..ولو بالنبض ما اطريته
وخياله أتخيله دايم يداعبني

لو ينشرى..أرخصت غالي المال وأغليته
ولو فيه حيله..ما أحد بالحيل يغلبني

ولو هو سهل..كان أصلا ماتمنيته
وماكان يقدر بأسلوبه يتعبني

لو الكل خلوه ما والله خليته
وضميري إن قلت أب اتخلى يأنبني

أحس لي معه يوم ماتحريته
وأدري نصيبي لذاك اليوم..يجذبني

أسيرة الصمت

~~~~~~~~~~~~~~~~~~~~~~~~~~~~~~~~

ابتسامة شفاهي

ابتسامة شفاهي أنت راسمها
أنت لحن السعادة وأنت فناني

فرحتي صورة بيدك تصممها
عوضتني بدل لوحات الأحزاني

السعادة بعيني شف معالمها
بدعت ريشتك بكل الألواني

من عيونك هدية عمري قدمها
شوفتك في عيوني ما لها أثماني

تختفي فرحتي ويضيع عالمها
كل ما تبتعد عني وتجفاني

المشاعر حبيبي لا تأزمها
تشعل الشوق بضلوعي وتنساني؟!

والمحبة وصالك هو بيحسمها
ما صهرت نار شوق ثلج هجراني!

دامني آخر أحبابك وخاتمها
لا يجي في مكاني واحد ثاني

أسيرة الصمت
~~~~~~~~~~~~~~~~~~~~~~~~~








شعري سفيري

شعري سفيري ولشعوري مترجم
وأنا اعتبرته منتدب لي ومرسول

ما اعرف بنفسي ولا اتجشم
دام الشعر لي سيف والسيف مسلول

من أعني يسمعني وأنا اتكلم
ويسمعني من لا كنت أعنيه بالقول

بدون ما أخطب أختصر وأتقدم
بعدة أبيات بدل كتب وفصول

أفرح وأسمع صرختي وأتالم
وأحزن وأسكت مسمعي واسمع القول

لما لساني بالكلام يتلعثم
أترك لسان الشعر بأوراقي يقول

انك حبيبي .. وانك بحالي أعلم
صدق شعور جاك بالشعر منقول

من صار أسير الصمت مثلي تعلم
ان السكوت أحيان .. ابلغ من القول

أسيرة الصمت
~~~~~~~~~~~~~~~~~~~~~~~~~~~~~

طعم المسرات

توي عرفت اليوم طعم المسرات
بعد التحرر من هواك وقيوده

صحيت من غيبوبة او مدري سبات
أيام كنت بيدك طفل تقوده

دمية تحركها بكل اتجاهات
وأنت الفضاء اللي ما تجاوز حدوده

كنت أشبه المسحور ماله خيارات
من وين أروح ألقى لك الدرب عوده

وكنت أنت مثل الضحكة أرسم بها شفاة
كنت الوجود اللي أنا من وجوده

عمري قضى كله وهم وانتظارات
لين أثمر بهمي رجاي وعوده

ويوم انصهر جفاك دمعة وحسرات
أطفا حنين الشوق وأحرق وقوده

الحب مثل النار تبدأ شرارات
ومهما لهبها طال تبقى امحدودة

تصبح رماد عقب ما هيب جمرات
مثل السحاب يزول لا أنهى رعوده

زرعت أمل وحصدت أسوا احتمالات
حلمي بعطر الياس فاحت وروده

لكنني ما أندم على الحب لو فات
بعض الشدايد عاقبتها امحمودة

أسيرة الصمت


~~~~~~~~~~~~~~~~~~~~~~~~~~~~

نزف المشاعر

دم المشاعر من سبب سيف الحزن والاكتئاب
وضمادها صدر الورق لا من تعذر شاشها

والدم ما ينزف عبث الا من جروح ومصاب
وكل نزيفه قد ما سهم المصايب ناشها

يا صاحبي ما شفت لك دم من هموم الصحاب
محد نزف دمه وما ذاق الجروح وعاشها

كم عين تسهرباكية.. تشكي معاناة الغياب
تندب حبيب قد رحل ما يوم حظه حاشها

وكم قلب متمرجح على نار المحبة لين ذاب
وكم نبضة متعلقة بين الألم وانعاشها

سبحان من خلى معاناة البشر فن وآداب
صارت على كف الزمن لون زها نقاشها

والناس لو تضغط علي شعري يجي بأحلى انسياب
وضمادها صدر الورق لا من تعذر شاشها

أسيرة الصمت

~~~~~~~~~~~~~~~~~~~~~~~~~~~~~~~~~~~~
نقاب و عبايا

كل بهالدنيا رزق له مزايا
وهالشي ربي خالقي خصني به

ياخذ ويعطي من جزيل العطايا
ومحد بياخذ فوق ما هو نصيبه

تدري مصيبة ذي ما هي ف هوايا
وان ما دريت فهذي اكبر مصيبة

لنا ..تقاليد هموم وقضايا
ما ترتبط بالدين عادة غريبة

نساءنا تحشر بضيق الزوايا
لأنها أنثى تدفع اكبر ضريبة

وارجالنا تشبهوا بالمطايا
الكل منهم ناقل دون عيبه

المشكلة ما هي نقاب ..وعبايا
من ساء مفهومه ترى الله حسيبه

طفح بي الكيل وكسرت المرايا
وقاطعت مجلس به نميمة وغيبة

سبة من أكلن بعضهن بالوشايا
كل وحدة منهن لها أنياب ذيبة

وسط العسل تدس سم الحيايا
و ما تستحي تسقيه لأقرب قريبة

قصدي انا كله تفادي الخطايا
وقتلتني الوحدة .. ظروفي عصيبة

يبون عقلية قرون خلايا
جروح جداد فوق ذيك العطيبة

أسيرة الصمت



الله من وقت مضى عا شواك الايام ولا حد عرفها هي تبكي من


دوس الاقدار
وانا مشي في نعش الاحياء اموات بدنيا

والشوق صدمها

لبس الثوب يلبس عا مقاسه

وللي يفصل ألامور لازم يعرف ثمنها

عز الله ماكل من مشى عا مايشتى يلقى عزايمها

تجري الرياح بما لا تشتهي السفن والباقي غالي ثمنه
كل روح لهاروح والروح معلقة برب خلقها
لا تخشى سواد الليالى وعيون ربك حرسها

وسلام على بنت تفاخر بنسبها

نسبها عالى شان في طبعها رفيعة العلوم للى صدقها
بقلمي
مع خالص ودي
والصلاة والسلام على خاتم الأنبياء والمرسلين أهلا هلا نرددها ما غرد الطير بشدو فوق أغصاني شكرا لكم من الأعماق قلبي


























الرجوع الى أعلى الصفحة اذهب الى الأسفل
 
قصائد فخر وتحدي للشاعرة اسيرة الصمت
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتدى الحلوين  :: المنتديات الترفيهية :: قسم الشعر والخوآطر.}...-
انتقل الى: